Tura: NPP dilgipa aro South West Garo Hills (SWGH)-oni APO-ni gisepo agangrikgipa audio recording, jolni saksa social media-o post ka·ani ja·man gipangaha. Sukrobar salo audio clip, gipaha.
Audio clip-o knana man·ani gita, NPP-ni president Assistant Programe Officer (APO)-ko man·engataha, jeni a·sel gipin block-rango kam ka·giparangba ua jolni gimik C&RD Block-rangona wenanggipa NPP worker aro dilgiparang ka·onangtokaha.
NPP dilgipani call ka·atako rim·na man·rikjae, APO, NPP dilgipana call ka·attaiaha. Indake APO-ni phone ka·atako ra·chaka jolan NPP dilgipa kragija kattarangchi inataha. Block-ni post-na galgipa application-ko ra·chakjani gimin NPP dilgipa ka·onangaha.
Audio clip-o knani gita, NPP dilgipa indine aganaha, “angni call ka·akode CM-ba ra·chakaia aro party-o angni biming bilongen chua. Iana skangba C&RD Block-ni gitcham BDO-ko ra·galataha, nang·koba apsan dake ra·galna man·aigen ine APO-ko ka·mikkenataha.
Minit 5 somoina agangrikanio APO, NPP dilgipao, mai gualaniko dakmanjok ine sing·aha aro recruitment ba mande ra·anio uni maming bil dongja ine aganaha, indiba NPP dilgipa uni kattako knachakjaha.
Ia ong·a obostako nike manderangni gisiko, NPP-ni leadership system-o sing·doanirang nakataha.
Indake ong·engon Garo Hills-ni BDO, ia mamlani gimin aganatengon, ‘iandakgipa obostarangko Block office-rango bang·a changon chagrongna gita nanga.”
“Worker-rang MLA ba minister-rang baksa agangrikani gimin chinga mamingkon dakna man·ja, je ong·oba maninan ga·akaia. Kamna mande rim·aniosan ong·ja, gipin project-ni kamrang jekai MGNREGA project ba PMAY house ba bill suala iandakgipa kamrangoba uamang chingko draatronga, ine BDO agankuaha.”
