Award man·gipa KVK-rangni bidingo salgittamna national seminar-ko ong·atenga

SHILLONG: Award man·gipa a·song gimikni Krishi Vidyalaya Kendra (KVK)-rangni bidingo national seminar-ko Budbar saloni a·bachenge Sukrobar salona, Umiam-o donggipa CAU-ni Post Graduate Studies in Agricultural Sciences College-o ong·atenga aro ia seminar-ko a·bachengatani somoio a·dokni Chief Minister Conrad K Sangma-ba dongpae bak ra·angaha.
Ia seminar-o bakko ra·e jinmana aganprakangengon, ia seminar-ara a·song gimiko skanggipa changna ong·atenggipa program ong·a aro ian KVK-rangni kamko mesoke on·gipa program ong·ani gimin namen gamchatgipa ong·a ine a·dokni Chief Minister parakataha.
“Ia seminar-o KVK scientist-rangni kamrangko mittelpilan baksana a·songni dingtang dingtang biaprango aro mongsongbate salgro salaram a·dokrango donggipa KVK-rangni kamrangko mesoke on·anichi game ge·e cha·enggipa manderangna namgniko ra·bana man·gipa program ong·enga,” ine Sangma aganaha.
Game ge·e cha·enggipa manderangko nirok sandianian Meghalaya sorkarini mongsonggipa daito ong·enga ineba Chief Minister parakataha.
“Game ge·e cha·enggipa manderang an·tangtangni kamrangko ka·anio dingtang dingtang neng·nikanirangko chagrongna nangenga aro uamang dingtang dingtang gadangrango dakchakanirangko nangenga,” ineba ua aganaha.
Gipin biaprango ranta ka·anirangko a·dokona ra·bae manderangko drae ja·rikataniara kraani ong·jawa ineba ua aganaha.
“Gama ge·ani chu·gimik bewalko dingtangataniara kraani ong·jawa indiba science-ni bewalo aro gital kolrangchi gama ge·aniko on·aniara rakbegipa kam ong·skaenga,” ine Chief Minister aganaha.
Game ge·e cha·giparangara a·songni gam-jinrang gita ong·a aro game ge·e cha·enggipa manderangni neng·nikanirangko namatna gita dingtangmancha chanchiani gnang kam ka·na nanga ineba ua aganaha.
A·dokona meliani kri a·dok ge·antian gipinrango ja·rikenggipa kamrangko skie ra·e ra·gatna man·na gita ia seminar-o chanchirimanirangko see rakkienba pilak a·dokrangnan sualatchina gitaba Chief Minister didiataha.