TURA: South Tura constituency-ni ning·o donggipa Nikwatgre gittimo tarienggipa ramani bidingo RTI-ko ka·ani ja·man, ia rama tarianiko dontongatahani gimin South Tura-ni gitcham MLA John Leslee K Sangma sing·doataha.
Sangma-ni parakatani gitade, ia ramara cement-chi tarigimin ramasa ong·ani gimin aro da·o ia tarigimin ramako concrete paver block-ni taridaptaiengani giminsa ua RTI-ko ka·ahachim indiba uni RTI ka·ani ja·man ia rama tarianiko dontongatskaahachim.
“Nikwatgre-o adita salrangna skang cement-chi tarigimin ramako paver block-ni ane taritaiengani giminsa anga ia kamko ong·nikjae an·tang ma·sina gita RTI-ko ka·ahachim. Ian angni ma·sie ra·na gita niamo pangchake sing·sandie ra·anisan ong·aiachim aro anga iani gimin badi ka·aba ong·jaengachim. Angni RTI ka·ani ja·man, ia rama tarianiko department dontongataha aro iako NPP, anga badi ka·a ine aganskaaha,” ine Tura-ni gitcham MLA John Leslee Sangma parakataha.
Sangma-ni parakatani gitade, iani bidingo ua September 28 tariko, PWD North Division-o RTI ka·ahachim.
Uni RTI ka·ani ja·man, ia rama tarianiko department dontongatahaon, NPP-ni dilgiparang aro membor-rang, Nikwatgre-o tom·aniko ong·atangenba, kamko dontongataha ine ukosa matnangskaaha ineba Sangma parakataha.
“Anga kamko dontongata dongjachim aro badi ka·aba dongjachim indide maini gimin NPP-ni manderang, rang·san dongtogija ong·tokaha? President-ni aganani gitade, angni RTI ka·anina Chief Minister Conrad Sangma-ba dongsiksakenga aro ia ramako tarina bil jakkalna miksongenga,” ine John Leslee parakataha.
Iani ja·mano ua Tura-o ong·enggipa obostarangni gimin name am·sandina skanirang ong·katengaha ineba ua parakataha.