TURA: Swachhata Hi Seva Campaign-ni bak gita District Level Swachh Bharat Diwas 2022-ko Sonibar salo, West Garo Hills District Swachh Bharat Mission (Gramin)-ni gita West Garo Hills a·jani Gambegre C&RD Block-ni ning·o donggipa Aminda Rangsa Multi Facility Centre-o manidilangaha.
Ia program-ko ong·atanio West Garo Hills a·jani Extra Assistant Commissioner (EAC) Saljagring G Momin, mongsonggipa sokgipa ong·e jinmana aganprakangengon, rongtal an·talan gapgipa India a·songko ong·atna Mahatma Gandhi-ni nikjumanganirangko gisik ra·atpilangenba, October-ni 2 tariko a·song gimikon jabolrangko galna aro pilak biaprangon rongtalatna gita ia Swachhta Hi Seva campaign-ko ong·atenga ine parakangaha.
Samtangtangkosan ong·aigija an·tangtangkoba rongtal an·tale rakkina nangani gimin janapangengon, samtangtang rongtalan baksana mandeni be·en aro gisikba rongtale dongosa an·seng baljoke aro pilak sabisi sakanchirangoni naljoke dongna man·a ine Momin parakataha.
National Statistics report-o see rakkianiko parakatengon, manderang iandake rongtal an·talaniko rakkijani a·selan an·tangtangni kam ka·e man·enggipa tangka paisarangoni 70 percent-kode sanna bananirango bon·atna gita nangenga aro bang·gija tangkarangkosan nokdangni nangarangna jakkalna man·enga ine Momin parakataha.
Plastic-rangko jakkalanichi mande aro mandeni samtangtango ong·telaigiparangna maidakgipa nangchakeanirangko ra·bana man·achim, uarangni giminba ia tom·anio Momin talate on·angaha.
Ia program-ko ong·atanio Open Defecation Free (ODF) ba skatang a·pal re·ani grigipa dambonga songrang, chong·motan Rongram Block-ni Ganol A·pal, Gambegre Block-ni Aminda Rangsa, Dalu Block-ni Marapara, Tikrikilla Block-ni Boldampitbari aro Dadenggre Civil Sub Division-ni Kalsingre songrangna dingtangmancha certificate-rangkoba on·angjolaha.
Ia tom·anio Swachhta Pledge ba rongtal an·talaniko rakkina jinma ku·mikchetanikoba dakangjolaha.
