TURA: Tura-o gital rikgipa Public Health Engineering (PHE)-ni sub-divisional office nokko Budbar salo, a·dokni Chief Minister Conrad K Sangma-ni jakchi nokdonggae on·angaha aro ia gital office nokko nokdonggae on·anganio West Garo Hills a·jani Deputy Commissioner Swapnil Tembe, Tura Municipal Board-ni Chairman JD Sangma, TMB-ni Chief Executive Officer RR Marak aro gipin officer-rangba dongpae bak ra·angaha.
PHE-ni sub-divisional office nokko nokdonggae on·anganio a·dokni Chief Minister jinmana aganprakangengon, COVID-19 sajinmani a·sel dingtang dingtang neng·nikanirangko chagrongna nangahaoba ia office nokko ta·raken matchotate on·na man·ahani gimin an·tangni kusi ong·aniko parakangaha.
Chief Minister-ni parakatani gitade, ia gital office nokko rikna gita 2019 bilsini November jaon work order-ko on·ahachim indiba COVID-19 sajinmani a·sel kamrangko 2021 bilsiosa a·bachengatna man·ahachim.
“Ia office nokko 2021 bilsiosa rikna a·bachengahaoba da·o ta·raken kamrangko matchotatna man·aha,” ine Sangma parakataha.
Meghalaya a·doko Jal Jeevan Mission (JJM)-ni kamrangko ka·anio chu·sokgipa ong·engani gimin re·anggipa October-ni 2 tariko Gandhi Jayanti-ko maniani somoio Jal Jeevan Mission-ni kamrangna a·songni President, Meghalaya a·dokni PHE department-na dingtangmancha upattiko on·aha ineba Sangma, an·tangni kusi ong·aniko parakataha.
Tura-ni PHE Sub-Division-ara Garo Hills-o gitchambatsranggipa sub-division-rangoni damsa ong·enga aro ia sub-division-ni ning·o Rongram, Rerapara aro Gambegre-ko man·chape Betasing aro Selsella-ni mitam bakrangkoba man·engachim.
Ia gital building-ko rikna gita State Plan-ni ning·o gong crore 1 lak 57 hajal 59-ko 2019 bilsion chame on·ahachim.