RONGJENG: Rongjeng sepango donggipa, Imsamdrop songni manderang-ko gronge, Rongjeng division-ni, PHE-ni official-rang, Imsamdrop songo, Jal Jeeval Mission (JJM)-ko on·ani gimin, Sukrobar salni bako talataniko dakaha, ine koboro parakataha.
Batanggimin salrango, Imsamdrop songni manderang, JJM-ko songna on·anirang matchotaha ine mesokgenchimoba songona chirangko ra·bae on·kujaenga ine matnange agantokaha. Uamangni matnange aganani gitade, project-ko nirokenggipa mandeba, uamangni masigijani somoio stamp ka·e, songo chirangko on·ani matchotaha ine tole office-na report-ko on·aha.
Songo donggipa manderangni aganani gitade, project-na kamko ka·aniko darang gipin mande ba gipin official-rang re·ange nijaha aro kam ka·anio a·bachengonin cha·bokna jotton ka·aha.
Badi ka·anirangko dakgenchimoba, PHE department-ni manderang songona kam ka·aniko nina gita re·angjaha. Unbaksana, jolni MLA-ni call ka·e aganatani ja·mano mangba uamang songona re·ange nijaha.
Indiba ia pilak jajani aro masisretanirangko, PHE official-rang Bristibar salni bako Rongjengo, songni manderangko gronge talate on·aniko dakaha.
Project-na kamko ka·aniko nirokenggipa mandeni aganani gitade, uamangni songona re·ange nianio, tap-rango chirangko man·aha aro project-ko 2021 bilsion matchote kam ka·aha.
”Chirangko salbaenggipa mangsonggipa pipe-o moilarang napani a·sel chirang jokbana gita man·jaha. Indiba iarangko ta·raken chinga tarie on·pilaha aro bang·a nokrangan da·o chirangko man·enga. Ia antini gisepon, songo donggipa nokrangona chirangko sokatna chinga rake kamrangko ka·gen,” ine PHE department aganangaha.
”Pipe-rangko nirokani aro nosto ong·o tariani giminba chinga skie on·anirangko dakaha aro iarangko chinga VSWC-na pakwate on·aha. Project-ko matchotani ja·manode chinga nirokna gita, VSWC-rangnan on·gnok,” ine department parakataha.
Manderangni singdoaniko dakenggipa, project, JJM-ni taritaina on·ggipa project ong·a. Project-ni ningaode chirangko songni nok 27-rangnasan on·anichim indiba uamang songo donggipa nok 37 gimiknan chirangko on·a miksongenga.
Indake, neng·nikanirangko man·ani somoio chirangko man·e on·ahanina, songni manderang, PHE department-ko mittele aganangaha.
