TURA: National People’s Party (NPP)-ni gitcham membor aro GHADC-ni gitcham chief executive membor (CEM) Dipul Marak-ko re·anggipa Bristibar salo, Bharatiya Janata Party (BJP)-ni bang·bea manderang Jengjal-o tom·chimongsoenba, dolona rimchaksoaha.
Re·baenggipa 2023 bilsini Assembly election-o ua, Rangsakona constituency-o BJP-ni candidate ong·e, TMC-ni Zenith Sangma aro NPP-ni Subir Marak baksa susaangna sienga.
BJP dolo napangani ja·man kobor ra·timgipa manderang baksa agangrikengon, a·songna namroro silroroaniko ra·bana miksonganiosa ua BJP-o napaha ine Dipul Marak parakataha.
“An·ching Meghalaya a·dokni pilak a·jarangon namroro silroroaniko nangenga aro ia namroro silroroanikode BJP dolmangmangsan ra·bana man·aigen. A·dokni manderang dingtanganiko nangniktokenga aro ia dingtanganiko BJP dolmangmangsan ra·bana man·aigen,” ine Marak parakataha.
GHADC-ni gitcham CEM-ko BJP-ona rimchaksoanio Tura-ni MDC aro Meghalaya BJP-ni state vice president Bernard N Marak-ba dongpaahachim.
Ia chang Assembly election-o BJP-na dongenggipa cholrangni gimin ua janapatskaengon, Garo Hills-o BJP-na cholrang nambatengani gimin uamang Garo Hills-na gisik on·bate kamko ka·enga ine Tura MDC parakataha.
“Garo Hills-o pilak political dolrangan chu·sokgipa ong·jahani gimin bang·a manderangan BJP-ko ra·chakbattokaha aro chinga Garo Hills-o bang·bate seat-rangko cheani cholrang dongenga. Chinga tangka paisa jakkalsretaniko bon·atna dakgrikenga aro manderang BJP-o napenga ong·ode, uamang an·tangtangan iandake tangka paisa jakkalsretaniko bon·atna miksongenga,” ine Marak parakataha.