SHILLONG: Khasi Students Union (KSU)-ni gitcham president Bull N Lyngdoh-ni chang 28-gipa siani salko Budbar salo, KSU-ni membor-rang gisik ra·e maniangaha.
Lyngdoh-ni siani salko gisik ra·e maniani bak gita KSU-ni membor-rang, Shillong Law College sambao tarie dongipa Bull Lyngdoh-ni mangkrongo pul bibalrangko done, una mande ra·pilskaanirangko dakangaha.
Bull Lyngdoh sagi, 1984 bilsioni 1989 bilsiona KSU-ni president ong·e kamko ka·angahachim.
Uni siani salko gisik ra·e manianio, KSU-ni president Lambokstarwell Marngar, jinmana aganprakengon, Lyngdoh-ni KSU-ko dilengmiting somoio bang·a manderangan uko golmal ong·atgipa mande ine matnangtokachim indiba uni siangani ja·mande, uko matnange agangipa apsan manderangan, ugita dakgipa dilgipako man·jawaha ine agantokskaenga ine parakataha.
Tribal jatrangko chel·chakna gita Bull Lyngdoh sagi, an·tangko aro an·tangni somoirangko on·kange kam ka·aha ineba Marngar aganaha.
“KSU-ni gitcham president, an·tangni manderangko chel·chakna gita an·tangko on·kange warachakgipa ong·achim. Uko pattoko donahaoba aro uni kosako bang·en case-rangko ka·ahaoba ua an·tangni dakgrikaniko dontongjahachim,” ine KSU-ni president parakataha.
Tribal jatrangni namgnina uni on·kanganiko aro ja·ku de·anirangko pangnan gisik ra·kamjringgen ineba Marngar aganaha.
Uni namgipa kamrangko daksningchina gitaba ua chadamberangko didiangaha.