SHILLONG: Sorkarini scheme-rangara manderangna ra·gatgipasa ong·ani gimin darang political dolba ia scheme-rangko a·kangna gita bil dongja ine United Democratic Party (UDP)-ni dilgipa aro Cabinet Minister Kyrmen Shylla parakataha.
“Sorkarini scheme-rangara manderangnisa ong·ani gimin NPP ba UDP ba je dolba ia scheme-rangko an·tangtangni ine a·kangna man·jawa. Paisa ge·antian manderangnisa ong·ani gimin political dolrang ia scheme-rangko maming dakeba a·kangna bil dongja,” ine FOCUS aro FOCUS plus scheme-rangni bidingo dingtang dingtang dolrang matnanggriktokengani gimin Shylla aganaha.
FOCUS aro FOCUS+ program-rangara manderangko salna politics-ni gita kal·anisa ong·enga ine adita salrangna skangsan, UDP-ni working president Paul Lyngdoh parakatahachim.
“Ia program-ara da·o ong·na sienggipa election-na vote-rangko brena ra·gatgipa program-san ong·aia,” ine UDP-ni working president Paul Lyngdoh parakatahachim.
FOCUS program-rangko jillarangko ra·gataniara niamrangko pe·ani gita ong·enga ineba Lyngdoh matnangatahachim.
Lyngdoh-ni aganani gitade, ia scheme-ara songadam nokadamrangna miksonge ra·gatgipa program-sa ong·achim aro ia scheme-ara 2011 bilsio game ge·e cha·giparangna a·bachengatgipa program-san ong·aiachim.
Ia program-ko West Shillong constituency-o Chief Minister Conrad K Sangma-ni mikkango a·bachengataha ineba ua aganahachim.
“Sorkari program-rangko maikai badiaba political dolni tom·anirangko parakna man·a? Game ge·e cha·enggipa manderangna ra·gatgipa scheme-ko, West Shillong constituency-o NPP-ni office bearer-rangko rimchaksona tom·aniko ong·ataniosa jinmana parakataha,” ine UDP-ni working president parakatahachim.
Iandake niamrangko pe·aniara mikkangchi ia scheme-ni kamrangko ka·anio neng·nikanirangko chagrongnaba gnang ineba ua aganaha.
“West Shillong constituency-o gama ge·ani a·arang dongjani gimin game ge·e cha·giparangni bimingrangko tarianio neng·nikanirang ong·katgen. Ia niam pe·aniko gital sorkari nipiltaina nangchongmotenga,” ine Lyngdoh aganaha.