SHILLONG: Re·anggipa February-ni 10 tariko Shillong songjinmani Thana Road-o donggipa Muscle Blaster Gym-o kam ka·enggipa me·chik saksako kragija dake kal·akna jotton ka·ahani gimin ia gym-ni nokgipa Raju Barua-ko police-rang rim·aha. Ua apsan salon, kal·akna jotton ka·ako man·gipa me·chik, Barua-ni kosako Sadar police station-o FIR ka·angani ja·man, police-rang dos dakgipa mandeko rim·aha.
Ia a·selni bidingo kobor ra·timgiparangna talataniko on·angengon, ua somoio ia gym-ni nokgipa uko an·tangni kuturiona okamatenba, an·tangko malis ka·china uko aganahachim indiba ua uko malis ka·na jechakon, ua me·asa uko drae rim·na a·bachengaha ine bilsi 19 ong·gipa me·chik parakataha. Gym nokgipani jaksuengmiting somoio ua, ua biaponi joke katbana man·aha ineba ia me·chik aganaha.
Ia me·chikni parakatani gitade, ia a·selko dongnuchina aro dos dakgipa mandeni kosako FIR ka·jachina gita dos dakgipa mandeni jikgipa aro uni nokdang uko draahachim indiba ua manigija ia mandeni kosako FIR ka·eaha.
“Ia gym nokgipa, angkosan ong·ja indiba bang·a me·chikrangkon an·tangni gym-o kal·akahani gimin anga uko kema ka·na nangnikjaha,” ine ua aganaha.
Ia a·sel ong·na salgittam skangsan ua gym-o kam ka·chengahachim ineba ia me·chik parakataha.
Koborko on·ani gitade, 2012 bilsioba ia gym nokgipa Raju Barua-ko noti dari dakani bidingo police-rang rim·ahachim.