SHILLONG: Meghalaya a·doko chief minister-ni biapko Khasirangna United Democratic Party (UDP)-ni a·kanganiara jatgnini gisepo ding·chaogrikaniko ra·bana man·a ine Bharatiya Janata Party (BJP) matnangataha.
BJP-ni state president Ernest Mawrie-ni parakatani gitade, Khasi Hills jolrango namroro silroroaniko ra·bana gita Khasirangba chief minister ong·na nanga ine Mawlai constituency-ni UDP candidate Process T Sawkmie-ni agananiara jatgnini gisepo ding·chaogrikaniko ra·bana aganani gitasa ong·ahachim.
Iani bidingo kobor ra·timgipa manderang baksa agangrikengon, Khasi aro Garo jatni gisepo ding·chaogrikaniko ra·banagipa kattarangko Sawkmie-ni agananiara namen ra·chakna man·gijani ong·a ine Mawrie parakataha.
BJP dolde, chief minister-ko seokanio darang jat ba toromna mikkang niteani dongjawa indiba CM ong·na kragipa mandekosa nangaia ineba Mawrie parakataha.
“Ua Garo, Khasi ba gipin jatoniba ong·china chingnade maming neng·nikani dongjawa indiba ua chief minister ong·na kragipa mandesa ong·na nanga,” ine BJP-ni state president aganaha.
2018 bilsio National People’s Party (NPP)-ni national president Conrad K Sangma-ko Meghalaya a·dokni chief minister-na seokanio UDP dolba mongsonggipa dol ong·achim ineba ua parakataha.
“Haida ua (Sawkmie) UDP-o napdaldalsa ong·engnaba gnang indiba an·ching dilgiparang ong·e pangnan doltangni gimin ma·sie ra·na nanga,” ine Mawrie aganaha.
Sawkmie-ni iandake chanchianiko gipin dolrangba namnikpajanaba gnang ineba BJP-ni state president aganaha.
Apsan daken NPP-ba, election-na chakpaanirangko am·engon iandake jatrangni gisepo toe aganjachina UDP-ko mikrakataha.
“An·chingni a·doko songdongenggipa jatrangni gisepo ding·chaogrikanirangko an·ching man·a dipet champengna nangenga. An·chingni politics-ni gita man·gnina an·ching a·dokko bak dakna man·jawa. Meghalaya a·dokko ku·cholsan ong·e rakkianian nambatgipa ong·a,” ine NPP-ni ku·wattimgipa Ampareen Lyngdoh aganaha.
Re·anggipa Sonibar salo, Mawlai-ni UDP-ni candidate Process T Sawkmie, gital a·dok sorkariko dilna gita Khasirangoni gital CM ong·china gita okamaniko on·angahachim.
“Gital sorkariko dilna gita an·ching Khasi manderangoniko nangenga. 2010 bilsionin bilsichetna Dr Mukul Sangma, chief minister ong·angaha aro uni ja·man bilsi bongana sakgipin Sangma (Conrad K Sangma) chief minister ong·angskaaha. Indide an·chingni Khasi jong-adarangoni Lyngdoh, Syiem, Kharkongor aro uandakgipa chatchirangonira bao? Maini gimin an·ching Khasirangoni CM ong·na man·jaenga?” ine Sonibar salo, Mawlai Iewrynghep Dorbar-ni gita Mawlai Presbyterian Higher Secondary School-o ‘common platform’-ko ong·atanio Sawkmie aganahachim.
A·chik chief minister-rangde namroro silroroani kamrangko Garo Hills-onasa ra·angenga ine janapatengon, international standard stadium-ko Shillong-o rikgen ine ka·susagipa manderangde ka·dongsoengachim indiba ia stadium-ko Tura-osa rikskaaha ine Sawkmie parakataha.
“A·dokni skanggipa state university-koba Tura-osa rikna sienga aro ian Garo Hills-ni CM ong·rongenganichi an·chingnade gimaani ong·enga ine mesokani ong·enga. Uni gimin mongsonggipa project-rangko Garo Hills-mangmangonasan ra·angaigija an·chingoba ra·na man·na gita Khasi aro Jaintia Hills-ni CM-ko nangenga,” ineba UDP-ni candidate aganaha.