BAGHMARA: Bristibar salo, Meghalaya a·dokni Chief Secretary DP Wahlang aro Director General of Police (DGP) Lajja Ram Bishnoi, South Garo Hills a·jaona re·baenba, re·baenggipa February-ni 27 tariko ong·atenggipa Meghalaya Assembly election-na tarisamsoanirangko nipilangaha.
Ia tom·anio South Garo Hills a·jani Deputy Commissioner S Awasthi, a·jao election-na tarisamsoanirangko talate on·angengon, South Garo Hills a·jao gimik dam 161 polling station-rang donga aro ia dam 161 polling station-oni dam 11-de jilla jolo aro dam 146-de songadam nokadamrango ong·a ine parakataha.
Polling official-rangna changgni dake training on·aniko matchotmanaha ine janapatengon, da·o gittamgipa training-koba February 23 tarikoni ong·atanggen aro a·jao songdongenggipa manderangna nama bewalo pu·onani bidingo mikrakataniko on·na SVEEP campaign-rangko ong·atenga ine Awasthi parakataha.
South Garo Hills a·jaode pangnan election-rangko tom·tome ong·atna man·ronga ine janapatengon, election-ni somoio maming so·sojengjeng ong·anirang dongjana gita police-rang, dingtang dingtang intelligence agency-rang baksa nangrime re·rurae nirok sandianirangkoba dakrongenga ine South Garo Hills a·jani Deputy Commissioner parakataha.
Ia tom·anio a·dokni Chief Secretary DP Wahlang, official-rangna aganprakengon, election-ko tom·tome ong·atna man·na gita dingtang dingtang cell-rangni gisepo name agangrikna nangani gimin talate on·angaha.
