SHILLONG: Jowai-ni NPP candidate aro MLA Wailadmiki Shylla, constituency-ni manderangko salna gita tangka paisarangko sualenga ine apsan constituency-ni TMC candidate Andrew Shullai matnangataha.
Jowai-ni MLA Wailadmiki Shylla-ni mande saksana tangka on·ani ku·rangko gipangani ja·man uni kosako TMC-ni candidate matnangataha.
Shylla-ni kosako matnanganiko parakatengon, NPP-o maming namroro silroroani kamrangko mesokna gita dongjani gimin manderangni vote-rangko man·na gita NPP aro uamangni candidate-rang, manderangna tangka paisarangko sualskaenga ine Shullai matnangataha.
“Uamang (NPP) tangka paisarangko bang·en koros ka·enga aro ian namen namjabegipa dakmesokani ong·a. Iandakgipa kamko anga pangnaba mikrontangchi nika dongkujachim,” ine TMC-ni candidate janapatenba, da·ororo skanggipa changna dilgipako seokenggipa manderangba an·tangtangni vote-rangko on·na gita maikobade bi·skaengaha ine parakataha.
Ia election-na ua bilakbate campaign ka·engaha aro bang·a vote-rangchin chena ka·dongenga ine janapatengon, Jowai-ni MLA ong·enggipa NPP-ni candidate, batanggimin bilsi bonganade gimachipahachim ine Shullai parakataha.
“2018 bilsini Assembly election-o cheani ja·man Jowai-ni MLA, bilsi bongana gimachipaha aro manderangko changsaba grongea dongjaha. Jowai-o dabienggipa B.Ed college, hospital aro Iawmusiang Market-ko da·onaba ua chu·sokate on·chipkuja,” ine Shullai aganaha.
Jaintia Hills-o badiaba dolni manderangsa niam gri koelarangko badingenga ineba TMC candidate matnangataha.