TURA: Sonibar walo election-ni kamko ka·na gita Tikrikilla-ona re·angengmiting somoio gari a·sel ong·e sianggipa election official Chesam Ch Marak-ni nokdangna Election department, gong lak 15-ko compensation dake on·na parakataha.
Gari a·sel ong·anio sianggipa Chesam Ch Marak, Tikrikilla constituency-ni Jangrapara polling station-o second polling officer-ni kamko ka·na gita donatako man·e Sonibar attamon, an·tangni election dol baksa polling station-ona re·chakatangahachim indiba rasong gribee uamangko salangenggipa pik-up gari, Potamati songo a·sel ong·aha aro ua bilongbee saknaanirangko man·ahani a·sel siangna gita nangahachim.
Indake ong·engon, uni sianganina Election department-ni gita kalimpaaniko janapatenba, sianggipa mandeni nokdangna gong lak 15 compensation-ko parakatjolaha.
“Tikrikilla constituency-ni Jangrapara polling station-o 2nd polling officer-ni kamna donatako man·gipa Chesam Ch Marak-ni tanggitik siani koborko man·soe chinga Election Machinery aro mongsongbate West Garo Hills a·jani gita kalimpaaniko on·enga. Chesam Marak, saksa gisiko nange kamko ka·gipa mande ong·achim aro iandakgipa a·selni somoio chinga uni nokdangko chingni bi·anirango gisik ra·gen. Election-ni kamko ka·engmiting somoio sianganina ia election official-ni nokdangna gong lak 15 tangkako compensation dake Election department on·anggen,” ine a·dokni Chief Electoral Officer FR Kharkongor parakataha.