SHILLONG: Meghalaya Assembly election-ni result-rangko parakatani ja·man Bharatiya Janata Party (BJP)-ni dilanichi gital sorkariko rikgenchimode ia sorkario bakrimaniko on·jawa ine Budbar salo, United Democratic Party (UDP) parakataha.
“BJP-ni dilanichi gital sorkariko rikgenchimode chinga bakrimaniko on·jawa indiba sorkariko rikna chol ong·genchimode chinga apsan dake chanchigipa dolrangni bakrimna bi·aniko ra·chakgen,” ine UDP-ni vice president Allantry Dkhar, kobor ra·timgiparangna aganaha.
Badia dolrang baksa bakrimgen, uade UDP-ni seat-rangko cheaniosa pangchakaigen ineba Dkhar parakataha.
“Da·o dipetde chinga agansamsonasan man·engkua indiba dam 59 constituency-ni result-rangko parakahaosa chinga nanga gita ja·kurangko de·anggen,” ine UDP-ni vice president aganaha.
Election-ni ja·man bakrimani bidingo da·o dipet UDP, darang dolrang baksaba agan-chanchirima dongkuja ineba Dkhar parakataha.
NPP-ni national president Conrad K Sangma aro Assam-ni Chief Minister Himanta Biswa Sarma-ni MDA 2-ko songna gita gronggrike agangrikgipani bidingo sing·on, da·o dipet UDP-de iani bidingo maming kobor dongkuja ine Dkhar parakataha.
Khasi-Jaintia Hills jolrango UDP, dam 15-oni dam 20-mangona seat-rangko chena ka·dongenga indiba Mongolbar salo ong·atanggipa UDP-ni tom·anio Garo Hills-ni dilgiparangde dongpajahani gimin Garo Hills-ni giminde ma·sikujaenga ineba UDP-ni vice president parakataha.
“Garo Hills-oba chinga constituency damgniode cholrang nambatenga aro Garo Hills-oniko chinga seat damsa chena man·genchimoba bilongen kusi ong·gen,” ine Dkhar aganaha.
UDP-oni CM-ni candidate-ko seokani giminba gital seokako man·gipa MLA-rangsa chanchigen ineba ua aganaha.