SHILLONG: Adita salrangna skang matchotanggipa Assembly election-o a·dokni chief minister aro NPP-ni national president, manderangna tangka paisarangko sualani a·selsa ua South Tura constituency-o ua amako man·rikaha ine BJP-ni state vice president Bernard N Marak matnangataha.
Marak-ni parakatani gitade, ia election-o nama bewalo susagrikgenchimode ua aro uni dol chegipa ong·telgenchim.
“Chinga tangkani bilko, police-rangko aro adminstration-ko apsan somoiode warachakna man·ja. Ua (CM) police-rangko, administration-ko aro tangkani bilko jakkalskaaha,” ine Marak a·kangataha.
South Tura constituency-o a·dokni chief minister aro NPP-ni national president Conrad K Sangma, 5,016 vote-rangchi BJP-ni candidate Bernard Marak-ko chee, an·tangni biapko ra·piltaiahachim.
Sorkario kam ka·gipa manderang uni aro BJP-ni kosako kamko ka·aha ine matnangatskaengon, “Ia election-o chinga political dol baksade susajaha indiba tangka aro bilni kosakosa susaaha,” ine Marak parakataha.
BJP-ko Kristianrangni kosako chakatgipa dol ine matnanganichi maiba neng·nikanirangko chagrongna nangahama ine sing·on, bang·bata constituency-rangon BJP, gnigipa ong·aha aro ia changode BJP-na pu·onaniba 13 percent-ona bariangaha ine Marak parakataha.
Meghalaya a·doko BJP-ko manderangni ra·chakani batrorobaengaha ine janapatengon, BJP-ko Kristianrangni kosako chakatgipa dol ine dingtang dingtang dolrang tol·e on·na jotton ka·ahaoba manderang, BJP-na pu·ontokaiaha ine BJP-ni state vice president parakataha.
Re·baenggipa 2024 bilsio Lok Sabha election-ko ong·atna siengani gimin a·doko BJP-ko bilakbatatna gita rakbee kamrangko ka·sognok ineba Marak parakataha.
