U·IATTIMGIPAONI
SHILLONG: Election-o susao sirike opposition dolni political-ni gita matnange Election Commission of India-ni model code of conduct-ko pe·a ine uni kosako matnangani bidingo Minister in-charge PHE aro Williamnagar MLA, Marcuise N Marak jeataha.
“Anga maming model code of conduct-ko pe·a dongja. Election-mitingo uamang pilakan maiba neng·nikani dongode maina model code of conduct-ko pe·a ong·ode maina sing·na nangarangko sing·ja,” Marcuise aganaha.
Williamnagar election tik ong·gijanirang donga aro model code of conduct-ko pe·aaro cha·bok-rusiani kamrang bang·a ine Marcuise-ni kosako matnange election ong·attaina nanga ine songsalna kam ka·gipa Tennydard Marak, Election Commission of India-na mol·molani chittiko seaha.
“Da·o uamang matnangenga maina Teenydart election-rango sirikgipa candidate saksana chakpaachim aro anga 5000-na baten vote-rangchi uni candidate-ko amataha,” Marcuise aganaha.
“Election-o sirikani a·selo je matnanganiko ua rachakna man·ja aro ia pilakan ong·gijanirang ong·enga,’’ ua aganaha.
Williamnagar-ni dilgipani model code of conduct-ko pe·ani bang·a a·selrangko janape, uni kosako raken ja·kuko de·na nanggen aro cha·bok-rusiani kamrangko gelna uni election-o cheaniko parakatanio ua sastiko man·a nanga ine Tennydard aganaha.