SHILLONG: West Garo Hills a·jani Dalu block ning·o donggipa Dalu aro Asiragre songrangko Budbar salo, African Swine Fever (ASF)-ni ‘epicentre’ ba sabisi man·chakgipa biaprang ine sorkari parakataha.
Animal Husbandry & Veterinary-ni Secretary in-charge Dr Manjunatha C-ni parakatani gitade, Meghalaya a·doko African Swine Fever giproroengani gimin re·anggipa March-ni 30 tariko wakni sample-rangko Guwahati-o donggipa North Eastern Regional Disease Diagnostic Laboratory (NERDDL)-o porikka ra·e niani ja·man West Garo Hills a·jani Dalu aro Asiragre songrangko sorkari, sabisi man·chakgipa biaprang ine parakataha.
Indake ong·engon, ia African Swine Fever-ni giproroaniko champengna gita ia songrangoni kilometer 1 ning·o ong·gipa pilak biaprangkon ‘Infected Zone’ ba sabisi man·gipa biaprang aro ia songrangoni kilometer 10-ni ning·o ong·gipa pilak biaprangkon ‘Surveillance Zone’ ba nirikkienggipa biaprang ine sorkari parakataha.
Infected Zone ine chanako man·gipa biaprango dakna nanggni aro dakna nanggijanirangko talate on·angengon, ia biaprango donggipa wakrangko, wak jilanio jakkalgipa biaprangko aro veterinary-ni on·gipa samrangko Surveillance Zone ba nirikkienggipa biaprangona aro Disease Free Zone ba sabisi grigipa biaprangona ra·angna man·jawa ine official-rang parakataha.
Ia Infected Zone ba sabisi man·gipa biaprango wakrangko jilenggipa manderang rongtal an·talaniko rakkina nanggen, wak jilgipa biaprango nanga gita chel·chakanirangko dakna nanggen aro wak nolrangona manderangni re·anganiko champengna nanggen ineba official-rang u·iataha.
Ia biaprangona re·anggipa garirangkoba rongtalatani ja·man aro samrangchi satani ja·manosa ia biaponi ong·katna on·gen.
African Swine Fever-ko man·gipa wak sioba tangoba, darang manderangan ia wakko ra·ongkatna man·jawa aro apsan daken wakni al aro gipin bosturangkoba dangtapna man·jawa.
Ia biaprango wak be·en dokani aro palanirangkoba chu·gimik champengatgen aro wak be·en palgipa biaprangko chipe donna nanggen.
Surveillance zone ba nirikkianiko man·enggipa biaprango dakna nangani aro nanggijanirangko talate on·angskaengon, ia biaprangonikoba wak, wak jilani bosturang aro samrangko sabisioni jakgitel ong·gipa biaprangona ra·jitangna man·jawa ine Animal Husbandry & Veterinary-ni Secretary in-charge Dr Manjunatha C u·iataha.
Ia biapo wakrangko nok damsaoni damgipinonaba ra·jitna man·jawa aro wak be·enrangkoba ia surveillance zone-oniko Disease Free zone-rangona ra·angna man·jawa ine official parakataha.
Sigimin wakrangko skatang chiring chibisik aro uandakgipa biaprango galgija, ning·tue cho·enba chunchi pindape gopna nanggen ine official u·iataha.