Sohiong constituency-o UDP-na ka·sachakani dongjawa: Congress

SHILLONG: Dontongatgipa Sohiong poll-o UDP chena ka·sachakaniko mesokgenchimoba constituency-o UDP-na maming ka·sachakani dongjawa ine Congress dol aganangaha.
Pala jean constituency-o lekka puonani ong·na am·enggipana party-ni gita tarisamsoanirangko nipilangahao indake aganangaha, party gisiko nangbate rake kamrangko ka·enga aro uamamgni worker-rang Congress dolna vote-ko on·china nokantini dogacholona re·ange mol·molanirangko dakenga.
“ Anga nipilaniko dakaha aro me·asarangni angna aganani gitade, ia lekka puonanio maming ka·sachakani mesokani dongjawa,” ine ua constituency-o skanggipa changna tom·bimonganio chanchianiko parakataha.
Sohiong constituency-o gitcham dilgipa UDP candidate HDR Lyngdoh-ni siani ja·man lekka puonaniko ong·atna am·enga ineba janapangaha.
Constituency-o skang chasongrangoni Congress dolnasa vote-ko on·achim indiba 2018 bilsioni jensalo HSPDP-ni candidate Samlin Malngiang Congress dolni dilgipa candidate HDR Lyngdoh-ko amaonin biapko ra·skaaha.
2023 bilsio Assembly poll-o Samlin Malngiang NPP dolo napaha aro HDR Lyngdoh-ba Congress doloni UDP-o napangskaha, ine koborna parakataha.