TURA: Dadenggre Block-ni Block Development Officer (BDO)-ko dingtang biapona ra·jitna manchianiko Garo Students Union (GSU) Western Zone (North) Dadenggre jegalatenba, ia BDO-ko apsan biapon dongkuchina sorkario dabiangaha.
GSU WZ (North) Dadenggre-ni parakatani gitade, da·o ong·enggipa Dadenggre-ni BDO-ko re·anggipa bilsini May 12 tarikosa Dadenggre-ona ra·baahachim indiba da·o uni ja 10 ba ja 11 ong·kuengmitingon uko dingtang biapona ra·jitangna gita sorkari tik ka·taiahachim.
Dadenggre Block-o A·chik officer-kosa BDO songchina aro officer-rangko iandake skatang kam ra·jitjachina gitaba GSU Dadenggre dabiangaha.
“Chinga A·chikku agangipa BDO-kosa Dadenggre Block-o nangenga maina uamangsa ia jolni manderangni neng·nikanirangko ma·sie kamrangko ka·na man·a. Officer-rang iandake bilsisa ong·gija kam ra·jitanikoba chinga raken jegalenga aro officer-rangna nanga gita somoirangko on·china didienga,” ine GSU Western Zone (North) Dadenggre parakataha.