TURA: Ia sal somoirango konta 10-na Garo Hills-o bijoliko kimitaniara niamni a·palo ong·enga ine Tura-ni BJP MDC Bernard N Marak parakatenba, Garo Hills-o bijoli kimitaniko dontongchina gita West Garo Hills a·jani Deputy Commissioner Jagdish Chelani-na sedoataha.
Deputy Commissioner-na sedoatgipa chittio Marak-ni parakatani gitade, Garo Hills-o konta 10-na bijoli kimitani bidingo a·dok sorkari, maming ainni gita u·iata dongkujani gimin iandake bijoliko kimitaniara niamni a·palosa ong·engachim.
“Ainni gita maming u·iatani gri bijoliko kimitaniara manderangni man·na nanganiko ra·sekaming apsan ong·enga. Ia sal somoirango pilakan bijoliko nangchongmota aro iandake konta 10-na bijoliko kimitengani a·sel manderang bang·en neng·nikanirangko chagrongna nangtokenga,” ine Marak parakataha.
Ainni gita maming u·iatanirang dongjagenchimode iandake bijoliko kimitaniko bakan dontongna nanga ineba Tura-ni MDC dabiangaha.
U·iatani ba ge·etanirang donggenchimode, bijoli kimitani bidingo Consumer Court-o ra·bina man·na gita unaba order copy-ko on·na nanga ine Marak dabiangaha.