SHILLONG: India a·songni Prime Minister Narendra Modi-ni chang 100-gipa ‘Maan Ki Baat’ program, name chu·sokgipa ong·aha aro iako Meghalaya a·dokoba dal·e ong·ataha ine Sombar salo Meghalaya BJP-ni dilgiparang parakataha.
Meghalaya BJP-ni state president Ernest Mawrie-ni parakatani gitade, Robibar salo ong·atanggipa ‘Maan Ki Baat’ programara namen chu·sokgipa ong·aha aro ia program-o dol 50-na baten BJP-ni mandal-rang bakko ra·angaha.
Ia program-ko ong·atani bidingo BJP-ni ku·wattimgipa aro gitcham MLA HM Shangpliang-ba talataniko on·angengon, Maan Ki Baat program-ara Prime Minister Modi aro a·songo songdongenggipa manderangni gisepo nangrimatgipa program ong·a aro ia program gitan a·songni Prime Minister, a·songo onbatgipa gadangni manderang aro bading chiwale cha·enggipa manderangna agan-ku·pattianirangko on·ronga ine parakataha.
Salgro salaram a·dokrango songdongenggipa manderangni bang·a changa sapanirangkon a·gilsakni manderang ma·sitokkujaengachim indiba Maan Ki Baat program-ni 99-gipa bako a·songni Prime Minister, a·gilsakni manderang baksa agangrikanichi iandakgipa changa sapanirangko ma·siatna man·aha ineba Shangpliang parakataha.
Ia Maan Ki Baat program-ni ja·man a·gilsakni gipin biaprango songdongenggipa manderang, Syntein songni gimin bang·en mittelpilanirangko parakattokaha ineba ua aganaha.
Manderang ia songo tarigipa bosturangko brena nangniktokenga aro songni manderang ia bosturangko internet gita palna miksongskaenga ineba Shangpliang parakataha.
“Ia Maan Ki Baat program-ara India a·songni songadam nokadamrangko a·gilsakni gipin biaprangna mesokgipa program gita ong·aha,” ine Meghalaya BJP-ni ku·wattimgipa aganaha.