SHILLONG/TURA: Ia 2023 bilsini Higher Secondary School Leaving Certificate (HSSLC) Science aro Commerce porikkani result-rangko Mongolbar salo parakataha aro ia bilsini Science aro Commerce porikkao Shillong songjinmani Laban Bengalee Boys’ Higher Secondary School baksana St Anthony’s Higher Secondary School-rang, chegopna man·aha.
Science stream-o Laban Bengalee Boys’ HS School-ni Arnab Dutta, 483 mark-rangko man·e aro English, Physics, Chemistry, Maths aro Computer Studies subject-rango man·e Top 10-ni skanggipa biapko man·aha aro Commerce stream-oba apsan skulnian Rishab Purkayastha, 484 mark-rangko man·e aro English, Maths, Business Studies, Accountancy, Entrepreneurship aro Economics subject-rango letter-ko man·e Top 10-ni skanggipa biapko man·skaaha.
Science stream-o Top 10-ni dokgipa biapna agrede gipin biaprangko St Anthony’s HS School chegopangskaaha aro dokgipa biapko Cherrapunjee-oni RK Mission HS School-ni Rahul Das man·rikskaaha.
Commerce stream-oba St Anthony’s HS School-ni saksni chatro chatrirang, Top 10-ni biap damsniko man·aha.
Ia bilsini HSSLC Science porikkao pass ka·ani percentage 78.84 percent gapaha aro Commerce stream-o 79.31 percent gapskaaha.
Ia bilsini HSSLC Science porikkako gimik sak 3,635 chatro chatrirang seaha aro ianoni sak 2,866 chatro chatrirang chu·sokgipa ong·aha. Commerce porikkako gimik 2,383 chatro chatrirang seskaaha aro ianoni sak 1,890 chatro chatrirang chu·sokgipa ong·aha.
Science stream-ni Top 10-o biming nakatgipa gipin chatro chatrirangara gnigipa biapo Shillong St Edmund’s HS School-ni Steffi Niza W Snaitang, gittamgipao St Anthony’s HS School-ni Eshita Bhattacharjee, brigipao Laban Bengalee Boys’ HS School-ni Suban Das, bongagipao St Anthony’s HS School-ni Soumitra Jha, dokgipao RK Mission HS School-ni Rahul Das, snigipao St Anthony’s HS School-ni Sargam Datta aro Sharmin Khongsit, chetgipao, St Anthony’s HS School-ni Sangam Paul, skugipao Biswadeep Nath aro chikkinggipao St Anthony’s HS School-ni Samjanai Synnah ong·.
Commerce stream-ni Top 10-o biming nakatgipa chatro chatrirangara, gnigipao St Anthony’s HS School-ni Akshat Poddar, gittamgipao St Anthony’s HS School-ni Satakshi Das aro Sneha Paul, brigipao Laban Bengalee Boys’ HS School-ni Akshat Das, bongagipao St Anthony’s HS School-ni Deepak Sethia, dokgipao St Anthony’s HS School-ni Nengneiching, snigipao St Anthony’s HS School-ni Phibalamti Marwein, chetgipao Mawsynram Border Area HS School-ni Nongkhraw Laloo, skugipao St Anthony’s HS School-ni Kashish Sharma aro Eleazer Lytep baksana Nongpoh Alpha English HS School-ni Rakhi Kumari Rai aro chikkinggipao Upper Nongstoin Anderson HS School-ni Daiairi Nongrem ong·a.
Indake ong·engon, ia chang HSSLC Science aro Commerce stream minggnion Garo Hills-oni saksaba Top 10-o biapko man·rikskajaha.