TURA: Dadenggre Civil Sub-Division-ni ning·o donggipa mitam office-rangode manderangna dangdike on·enggipa mitam officer-rang kamrangko tik ong·e ka·jaenga aro mitam officer-rangde biaptangon asongjaenga ine changni chang badi ka·anirangko man·soahani gimin re·anggipa Mongolbar salo, Dadenggre constituency-ni MLA Rupa M Marak, Fishery office-ko tanggitik re·ange nieaha ine kobor on·aha.
Ia fishery office-ona re·ange nion, office-o officer saksaba donggijako nikeaha aro ia office-o chowkidar saksansa pangnan donga gita ong·enga ine ma·sina man·aha. Ia office nokni obostarangko niangon, nokkingni ceiling-ba nosto ong·e lekka carton-rangkosa ceiling dake tarie jakkalenga aro office-ni toilet-rangba nokking gri namgija obostao ong·engakosa ua nikbaaha ine u·iataha. Ia office-ko kulichengonin bilsi 20 batpile bijoli aro chiba dongkuja ineba ua nikbana gita man·aha ine u·iataha.
Dadenggre fishery office-ona re·ange nieanio, officer donggijaniko nikbae Dadenggre MLA Rupa Marak, joljolan West Garo Hills a·jani Deputy Commissioner Jagdish Chelani-na phone ka·ataha aro ia office-ni obostako aro kam ka·gipa officer-rangko nirokatchina didiataha. Uandaken Deputy Commissioner-ba ia office-ni obostako aro kam ka·giparangko nirokatna gita MLA-na ku·rachakaniko on·ataha ine kobor on·aha.
Dadenggre Civil Sub-Division-ni ning·o kamko ka·enggipa dingtang dingtang officer-rangkoba, somoi gita office-o asongchina aro jolni manderangna nambate dangdike on·angkuchina gita Dadenggre MLA didiataha.