SHILLONG: Assam aro Meghalaya a·dokni simarango meligrikna man·jaenggipa biaprangoni Block II-ni ning·o donggipa dam 22 songrangde Khasi songrangan ong·a aro ia songrang gimikan Meghalaya a·dok ning·on dongna nangniktokenga ine Ri Bhoi regional committee-ni membor aro Mawhati-ni MLA Charles Marngar parakataha.
Marngar-ni parakatani gitade, ia dam 22 songni manderang pilakan Meghalaya a·doko ong·na nangnikenganiko mesokna gita dingtangmancha resolution-oba soi ka·tokahachim.
Re·anggipa Sukrobar salosan, a·dokni Deputy Chief Minister aro Ri Bhoi regional committee-ni chairman Prestone Tynsong-ni dilanichi, committee membor-rang baksa tom·aniko ong·atahachim aro Marngar-ni parakatani gitade ia tom·anio, ia dam 22 songrango donggipa manderangni nangnikanirangkoba regional committee-na on·angaha.
“Da·o changgipin regional committee-ni tom·anio mesokna man·na gita ia songrangni gipin lekkarangkoba chimongna gita anga somoirangko on·dapchina chingni chairman aro Deputy CM-ko mol·molaha. Assam baksa da·o gnigipa changna agangrikaniode an·chingni a·arangko Assam-na gimaatna sikjaengani giminsa anga ia pilak kamrangko ka·enga,” ine Mawhati MLA parakataha.
Ia jolrango maming so·sojengjeng ong·anirang dongja ine KHADC-ni Karbi Anglong Autonomous Council (KAAC)-na seatgipa chittikoba regional committee-na on·ataha ineba ua aganaha.
“KHADC-ni gital Executive Committee-ko ia sima jolrangona re·bae niechina anga nangnikenga. Anga uamangna ia jolrango ong·enggipa chong·mot obostarangko mesoke on·gen,” ine Marngar parakataha.
Ia gnigipa changna agangrikanio Meghalaya sorkari, Assam a·dokna bame on·jachina gita ua kamrangko nirokanggen ineba Marngar parakataha.
Assam aro Meghalaya a·dokni simarango meligrikna man·jaenggipa biaprangko namatna gita skanggipa agangrikaniode Marngar-ko Ri Bhoi regional committee-o membor dake rimnapjahachim ine nikna man·a.