50% batpile bijoli chu·onggijaniko ra·chakna man·ja: HC

Tura: A·doko 50% na batpile bijoli chu·onggijaniko nikaniara ra·chakna man·gijani ong·a ine Meghalaya High Court parakaha.
A·doko bijoli kimitani bang·a somoirangon konta 12-na batangpilani gimin saksa social activist, Flaming B Marak-ni PIL on·gipani bidingo High Court mijalo knaaniko dakangaha. Aro PIL on·gipa bidingo Meghalaya High Court-ni Chief Justice, Sanjib Banerjee aro judge W Diengdoh mang hearing-ko dakaha.
A·dok sorkarini representative-rangchi skango aganchakaniko on·gipako Court nipilataha, jeon Meghalayana salo 200 MW bijoliko nanga, jeon bijolikoara salo 88 MW-kosan bikotna man·aia ine report-ko on·ahachim. Aro wachi-karina skang mikka bitchirangko man·jani a·sel bijolirangko kimitna ga·aka ineba aganchakaniko on·ahachim.
“A·dok sorkarini gita report-rangko file ka·genchimoba, uamangni file ka·gipa report-o chu·gimik obostarangkode janapani dongjachim. Aro ua report-rangko wachi-karina skangsa May jani gisepo file ka·ahachim. Mikka bitchirang dongjani a·sel, Umiam-ni chirang namen tipaha aro bijoliko chu·onge bikotna man·jaha ineba report-o janapahachim. Unomitingo a·doko mikka waanirangko nikna man·engaha aro Umiam-ni chiba tang·aha, unigimin bang·bata neng·nikanirangko nirokatna man·gnokchim,” Court chanchie nirikaha.
“Nangchongmotgipa service providers kamrangko dake ka·e on·enggipa mitam dolrangnade bijolirangko siatgijan on·enga ine re·anggipa July 5 tariko a·dok sorkarini palo status report file ka·gipao janapaha indiba, da·omitingo bijoliko badita nanga aro baditako on·enga uarangko janapja aro bijolirangko on·na gita maidakgipa kamrangko ka·engachim ukoba janapja” ine parakaha.
A·doko 50% na batpile inditana bijoli chu·ongijanikode namemanchan ra·chakna man·gijani ong·a ine Court parakaha.
“Mikkarang chu·ongjani a·sel ba ba gipin obostarangni a·sel, salantio on·na nanggipa bijolioniko 10% mangni gita adita somoirangna on·na man·janaba donga. Indiba da·ororo aro ia chasongo 50-60 percent ong·pile bijoli chu·ongatgijanikode ra·chakna man·ja jeni a·selan noko-jamo aro bading-chiwalgiparangna namen neng·nikaniko ong·atenga” ine Court nikrikaha.
Unomitingo ru·uta somoirangna chanchisamsoe kamrangko ka·china gitaba Court, sorkariko aganaha.
Indake changgipin hearing-ko mikkang Jul 25 tariko dakangtaigen.