U·IATTIMGIPAONI
SHILLONG: Sukrobar salo, a·dokni Social Welfare Minister Paul Lyngdoh-ni dilanichi West Khasi Hills a·jani regional committee, songni nokni dilgiparang aro dingtang dingtang NGO-rangko grongenba, Assam aro Meghalaya a·dokni simarango ong·enggipa golmalrangko namatna ja·ku de·enggipani gimin agangrikangaha.
Cabinet minister aro regional committee-ni chairman Paul Lyngdoh-ni parakatani gitade, ia tom·anio KHADC-ni dilgiparang, dingtang dingtang songni dilgiparang aro West Khasi Hills a·jani KSU, HYC, FKJGP, WKSU aro HITO dolrangko man·chape dingtang dingtang NGO-rangba bakko ra·angaha aro ia tom·anio, Langpih jolrango ong·enggipa obostarangko a·dok damgnini regional committee-rang re·ange nina skang, uamangni nangnikanirangkoba knatime ra·angaha.
Ia tom·ani namen chu·sokgipa ong·aha ine janapatengon, ia tom·anio Langpih jolo donggipa dam 41 songni dilgiparang bakko ra·angaha ine Lyngdoh parakataha.
Langpih jolo donggipa dam 52 songrangoni dam 41-de Meghalaya a·doko aro dam 9 songrangde Assam-o ong·na nangnikenga ineba West Khasi Hills regional committee-ni chairman parakataha.
Ia jani gisepon West Khasi Hills a·jani regional committee, Assam-ni committee baksa Langpih jolrangona apsan re·ange nianggen ineba ua parakataha.
Indake ong·engon, ia jolrango songdongenggipa manderangni daka rikani aro manderangni skanio pangchake ia committee ja·kurangko de·anggen ine regional committee-ni membor aro MLA Renikton Tongkhar parakatskaaha.
Langpih jolrango songdongenggipa manderangni nangnikanirangko ia committee ra·chakahani gimin uamangni nangnikanirangko Assam sorkari ra·chakgen ineba Tongkhar, an·tangni ka·dongchakenganiko parakataha.