U·IATTIMGIPAONI
Ampati: South West Garo Hills-o Meghalaya a·dokni Early Childhood Development (ECD) Mission-ni bidingo skanggipa changna block-ni gita ong·atgipa tom·bimongani tom·tome matchotangaha. Ia tom·aniko jat manderangni janggi tanganiko nambatatna ja·ku de·angna ong·ataha. Tom·ao bi·sa bakgitchak sianirang aro department-ni gita nangrime kam ka·ani gita mongsonggipa neng·nikanirangko agane on·a tom·ao nisan donaha.
South West Garo Hills Deputy Commissioner, BDO, Betasing C&RD Block aro ECDM a·dokni team baksa, bang·a department-rang aro agency-rangoni skie on·timgiparang baksa mijalo Ampati-o convention-ko ong·ataha uno district-rangoni, block-ni pilak daitoko jako ra·e kamko ka·giparang aro jatni gita manderang dongpaaha.
Atchiaonin bilsi 8-ona kingking bi·sarangko gisik aro be·enni gita neng·nikaniko agangrikachi nambatatna a·dok sorkarini ECD Mission-ni skani ong·a.
A·dok gimiko namgni aro man·anirangko apsan suale on·a ge 15 block-rang donga uarangna ADB, Mission-na tangka-paisako on·ataha.
Batanggimin ja dok jarango sak dok bi·sa bakgitchakrang siani koborko man·aha uko janape Deputy Commissioner, R P Marak aganaha. Ia obostani gimin chanchina nangkuenggipa ong·engon, ua apsan somaio bi·sa an·pakgipa ma·gipa siani report dongskaja. Nangrime bimchipe jotton ka·anichi ia chu·sokanirangko Marak aganaha.
Bang·a department-rangni gisepo ku·cholsan kam ka·aniko nangenga, C&RD block office, Social Welfare, Education baksa melie kamko ka·china aro manderangni chagrongenggipa neng·nikanirangko agana aro ma·siatna Health department-rang aro gipin daitoko jako ra·e kamko ka·giparang mongsonggipa ong·a.
ECD Mission-ko namedake ra·gatna a·bachenga gadangoni kosakgipaona jat manderangni bimchipe bakko ra·ani gimin agana iako ra·gataha. Convention-o songni nokmarang, VHC-rang, VEC-rang, ASHA-rang, Angandawi worker-rang, SHG-rang aro gipinrangni gisepo VO-rangko man·chape Betasing Block ning·o donggipa song 32 songrangoni sak 200-na baten bakko ra·aha. Chanchigrikanirango uamang uamangni u·i-ma·sianirangko aganaha. Songrango Anganwadi centre-rang dongkujaenga aro ua neng·nikaniko agana ja·kurangko de·angna nanggen uamang aganaha.
Salgimikni tom·ao skie ra·na cholko on·a MSRLS, NHM, ICDS, SRES-ko man·chape bang·a sorkarini agency-rangoni skigipa training on·giparang bi·sa chonmitingni mongsonggipa ong·ani gimin agane kamrangko skie on·angaha.
BDO, Betasing, C R N Sangma, Mission aro tom·ako ong·atani miksongani gimin talate on·aha.