TURA: Asaam-ni niamko ra·gataonin a·dokona matchuko ra·bana man·jahani gimin TMC, suk ong·gijako parakataha.
“Assam-ni niamko donna ba ra·gataonin Meghalaya-ona matchu supply ba ra·baaniko champengatsrangaha, matchu be·enni palo matma be·enkosa palskana nangenga. Matchu be·en dam rakanio iaba mingsa ja·dil ong·a, una agreba matchu be·en pagiparangna namen neng·nikani ong·enga. Iarangni kosako niamgri matma be·enko palenggipa bajar ba anti sokbaskaha, ian be·en-bitinko kakket ong·e bading-chiwalaniko bon·atenga. Matma be·enko cha·anio maming neng·nikade dongja, indiba manderang, maiko cha·enga, iako u·ina nanga. Butchers’ association, iako champengna chu·sokjaha, sorkariba ia mamlao ja·ku de·gen ineba aganna man·ja. Indakgiparangko champengnade a·doko manderang noktangtango matchuko jilanisan ong·aijok,” ine party-ni dilgipa Richard Marak aganaha.
Assam-ni Chief Minister Himanta Biswa Sarma, Meghalaya a·doko songdonggiparangni kosako an·tangni namnika gita dakdraatna jotton ka·enga, ine TMC, matnangaha.
“Rasong grie a·dokni Chief Minister Conrad Sangma-ni dilenggipa MDA sorkari, Assam-oni man·enggipa sinjetaniko warachakna amja. Songsul a·dokni ning·on kene dongna namnikbatakon. A·dokni manderangna pangnaba chakatrongja. Sorkari, a·dokni chagrongenggipa neng·nikako niatani palo politics kal·nasa gisik nangbata.”
“Iandakgipa songsul a·dokni on·gipa neng·nikarangko MDA sorkari, bilake warachakna nanga. Chief Minister, Meghalaya-ni manderang baksa chadenge, neng·nikako maidake namatna man·gen, iani gimin ja·ku de·na nanga.”
