SHILLONG: Meghalaya a·doko 108 Ambulance Service-ko chalaina gita a·dok sorkari, da·o tender on·ani kamrangko ka·engaha aro tender on·ani kamrangko September jao matchotna ka·dongenga ine kobor on·aha.
Sombar salo, 108 Ambulance Service-o kam ka·giparangko grongani ja·man kobor ra·timgipa manderang baksa agangrikengon, uamang 108 service-o kam ka·enggipa manderangko October jao grongtaigenba, tender on·ani kamrangni gimin talate on·anggen ine a·dokni Health Minister Ampareen Lyngdoh parakataha.
108 ambulance service-ko a·dok sorkari an·tangaride chalaina man·jawa ineba Health Minister talataniko on·angaha.
Da·o dipet a·doko 108 ambulance service-ko a·dokni National Health Mission (NHM) chalaisochengengachim aro iako chalaikamna gita sorkari, company-ko man·kujaengachim.
Iana skangde a·doko 108 Ambulance service-ko GVK-EMRI chalaiachim indiba re·anggipa bilsio ia company-na on·gipa contract-ko a·dok sorkari ra·pilani ja·man da·o NHM-sa chalaisochengskaengachim.
Indake ong·engon, 108 ambulance service-ko chalaina gita ta·raken company-ko seokchina uamang sorkariko didiaha ine Meghalaya EMRI Workers Union-ni adviser Susan Lyngdoh parakatskaaha.
Union-ni parakatani gitade, da·o dipet 108 ambulance service-ko NHM-sa temporary basis-o chalaiengani gimin kam ka·enggiparangba dormahana agrede gipin man·gnirang dongkujaengachim.