SWGH a·jao Azadi ka Amrit Mahotsav-ko manianga

AMPATI: India a·songni jakgitelko man·aoni bilsi 76 gapaniko manina gita a·song tarisamsoengon, Budbar salo, South West Garo Hills a·jaoba Azadi ka Amrit Mahotsav-ko dingtangmancha ‘Meri Matti Mera Desh’ ine bimingko donenba, Kumligaon songo donggipa Taljawa Lake-o maniangaha.
Ia salko manianio dingtangmancha, a·songko warachakanio janggitangtangko gimaatna nanggipa sipairangna ia biapo jinma mande ra·pilskaaniko dakangaha.
Ia salko manianio South West Garo Hills a·jani Deputy Commissioner RP Marak, jinmana aganprakangengon, a·jao namroro silroroaniko ra·bana gita dingtang dingtang scheme-rangko chu·sokatna pilakkon ku·cholsan ong·e kam ka·china gita didiangaha.
Manderangna dangdike on·engon, an·tangtangko gital dake on·kangtaichina gitaba ua sorkario kam ka·enggipa manderangko didiangaha.
Ia tom·anio South West Garo Hills a·jani Superintendent of Police (SP) V Kumar-ba jinmana aganprakangengon, a·songni jakgitelaniara dingtang dingtang jatni daka rikani, ku·cholsan ong·ani, ka·saani, gamchatani aro bebera·anirangko mesokani ong·a ine parakangaha.
Azadi ka Amrit Mahotsav-ni ning·o iandakgipa program-rangko ong·ataniara a·songna dangdike on·anio an·tangtangko gital dakna gita cholrangko on·ani ong·enga ineba Kumar aganaha.
Bon·kamao, sianggipa sipairangna mande ra·pilskaaniko on·na gita ia program-o bak ra·gipa manderang, pulrangko donangtokaha.