U·IATTIMGIPAONI
SHILLONG: Meghalaya a·dokni SSA skulrango skigiparangna bakan a·dok sorkari, gong kror 52 tangkarangko watna siengaha ine Mongolbar salo, Education department-ni Advisor HM Shangpliang parakataha.
Shangpliang-ni parakatani gitade, ia tangkarangko sorkari, SSA skulrango skigiparangni dormharangko on·na gita watatgen.
“Ia tangkarangko watatn gita sorkari da·o kamrangko ka·engaha aro ia kamni file Education department-oni re·angahani gimin ia tangkarangko sorkari watahaode, SSA skigiparangna gong kror 52 tangkarangkoba chinga watatna man·gnok,” ine ua aganaha.
Gong 52 tangkarang baksana sorkari, SSA skigiparangna bangki dongkuenggipa arrear-rangnaba tangka paisarangko watatna sorkari ku·rachakaha ineba Education department-ni Advisor parakataha.
“Arrear-ni skanggipa installment-ko June jao watataha aro gnigipa installment-koba ia jao watataha. Dormaharangko on·ani kamrangba da·o a·bachengaha,” ine Shangpliang aganaha.
SSA skigiparangni dingtang dingtang neng·nikanirangko namatna gita sorkari kamrangko ka·engahani gimin mikkangchi pilak SSA skulrangon lekka porani gadangrang nambatna gita da·o Education department ka·dongenga ineba Shangpliang parakataha.