U·IATTIMGIPAONI
SHILLONG: Assam aro Meghalaya a·dokni sima jolrango songdongenggipa Khasi-Pnar aro Karbi manderangni gisepo tom·tomani aro meli nangrimaniko rakkiangna gita Jaintia Students Movement (JSM) aro Karbi Students Association (KSA), Students’ Committee for Peace Initiative (SCPI)-ko songaha ine kobor on·aha.
Adita salrangna skang, JSU aro KSA-ni membor-rang, Assam Karbi Anglong a·jani Diphu-o tom·aniko ong·atangenba, sima jolrango songdongenggipa manderangni gisepo tom·tomaniko rakkiangna gita ia SCPI-ko songaha.
Ia tom·anio JSM-ni president Leningstar Rymbai aro KSA-ni president Mijreng Kro bakko ra·e, an·tangtangni dolrangko dilangaha.
Dolgnini gisepo tom·tomaniko rakkina gita KSA-ni membor-rang, Jaintia Hills-ona re·anggen ineba ia tom·anio tik ka·angaha.