U·IATTIMGIPAONI
TURA: Meghalaya a·dokni Reservation Policy-ko gital dake nipiltaianio pilaknan apsan bak rengsiko tikatna man·na gita sorkarini songe on·gipa expert committee-o a·dokni mongsonggipa Tribal jatgittam, chong·motan Khasi, Jaintia aro Garorangonikoba bak ong·atchina gita Tura-ni saksa social activist Cherian G Momin, a·dokni Chief Minister Conrad K Sangma-ko didiataha.
Chief Minister-na sedoatgipa chittio Momin-ni parakatani gitade, reservation policy-ko gital dake nipiltaianio maming mikkang niteani dongjana gita aro nambate tarina man·na gita gipin biapni manderang baksana ia expert committee-o Khasi, Jaintia aro Garorangonikoba membor dake donatna nangchongmotenga.
“1972 bilsini job reservation policy-ara kamrangko man·na aro a·dokni namroro silroroanio bang·en nangchakeaniko ra·bana man·a aro ian manderangni janggi tanganio aro Meghalaya a·dokko tarianioba namen mongsonggipa bak ong·a. Uni gimin expert committee-ko songanio an·chingni songsalo dingtang dingtang jatrangni donganiko mesokna aro pilak mongsonggipa jatrangni ku·rangko on·gipaba dongna nanga,” ine Momin parakataha.
Expert committee-o sorkari nambatgipa aro kamni gimin u·i-ma·sibatsranggipa manderangkon donaha ine an·tangni ka·dongchakenganiko parakatengon, job reservation policy-ko gital dake nipiltaina songgipa expert committee-o a·dokni mongsonggipa Tribal jatgittamni dilgiparangkoba donatgenchimode ian reservation policy-ko nambate tarinasan ong·aigija pilak jatrangna apsan bak rengsiko tikatna dakchakani ong·gen ine Momin parakataha.