SHILLONG: NEHU Tura campus-ni hostel-o saksa Nagaland-ni student-ko ragging ka·gipani mamla kakket ong·chongmotode ian ra·chakna man·gijagipa ong·a aro dos dakgipa-rangni kosako ja·ku de·na nanga ine Education Minister Rakkam A Sangma, Sonibar salo aganaha.
Ia mamlako da·oba sandikuenga, uni gimin ia mamlako name dake talchenggijade kattako ku·watna namkujawa, jeba ong·bo iandakgipa obosta skang salrango maming saloba ong·a dongja uni gimin ia obosta ong·chong-mota ong·ode, iako raken jegalata ine Minister aganaha.
Batanggimin October jani 8 tariko Nagaland-oni NEHU Tura-ona Agri Business Manangement-ko poraigipa first year-ni student-ko NEHU Tura campus Arabella hostel-o sak 5-6 senior student-rang ganding-chinding gri chrokataha.
Duko ga·akgipa ba ragging ka·a man·gipa student, hostel-ni proctor Dr Gino Sangma-na chittiko seachi badi ka·ani ja·mansa ia obosta ong·ako u·ina man·aha. Indake NEHU authority ia mamlako sandina a·bachengaha. Shillong-oni investigation team-ba Tura campus-ona sokange mamlako sandiaha.
Minggipin university-ni gita ia mamlako sandiao maming sakkirangko man·-jani gimin aro WHG police baksa agangrikjani giminba university-ko obosta ong·ako donnuna jotton ka·enga ine matnang-tokaha. Nagaland-ona re·pilange duko ga·akgipa student-ni ‘Zero’ FIR ka·ani ja·mansa ia mamlako police-na sandina pakwataha.