U·IATTIMGIPAONI
SHILLONG: Mijal Bristibar salni bako a·dokni Cabinet tom·e chanchirimangenba, MBOSE-ni class-rango NCERT-ni text book-rangko ra·gatna tik ka·angaha.
NCERT-ni text book-rangko MBOSE-ni class 1-oni class 10-ona ra·gatna tik ka·angaha aro text book-rango jatni daka rikani, itihas aro dingtanganikoba ra·chapna Cabinet tik ka·angaha.
Iani bidingo kobor ra·timgiparangna talataniko on·angengon, a·dokni chatro chatrirangkoba a·songni gipin biaprango poraienggipa chatro chatrirang baksa apsan ong·atna aro national level-o susapana man·na gita MBOSE-ni class-rangoba NCERT-ni text book-rangko ra·gatna tik ka·aha ine a·dokni Chief Minister Conrad K Sangma parakataha.
Textbook-rang bang·batan bakrotokani gimin NCERT-ni text book-rangko ra·gatna nangenga ine janapatengon, chatro chatrirangna altubatna gita ian text book-rangko bakkandikatna dakchakani ong·gen ine Chief Minister aganaha.
Education department-o ge 187 kamrang bangbang ong·e dongengani gimin ia kamrango ta·raken kam ka·giparangko gapatna man·na gita Cabinet, Education Recruitment Board-ko songna gitaba tik ka·angaha aro ia sak 11 membor-rang donggipa board-ko additional chief secretary ba education department-ni principal secretary dilanggen ineba Chief Minister parakataha.
Labour department-ko gital dake biming mingnaba ia tom·anio Cabinet tik ka·angaha.
“Labour department-ara namen dal·gipa department ong·a aro ia department-an dingtang dingtang kamrangko ka·e cha·enggiparangko nirokgipaba ong·ani gimin chinga ia department-ko Labour, Employment & Skill Development Department mingskana tik ka·angaha,” ine Chief Minister aganaha.