U·IATTIMGIPAONI
TURA: Re·baenggipa 2024 bilsini January 15 tarikoni 21 tarikona changbongagipa Meghalaya Games-ko Tura-o sokachakna siengani gimin Mongolbar salo, West Garo Hills a·jani Deputy Commissioner Jagdish Chelani, dingtang dingtang department-ni official-rang baksa tom·aniko ong·atangaha.
Tura-o iandakgipa kal·susaaniko sokachakani ian skanggipa chang ong·engani gimin, ia Meghalaya Games-ko name chu·sokatna man·na gita pilak officer-rangkon an·tangtangna tikatgimin kamrangko name chu·sokatchina gita ia tom·anio Deputy Commissioner didiangaha.
Tura jillako nitoatani bidingo chanchirimangengon, gittimtangtangko rongtal an·tale rakkina aro nitoatna gita dingtang dingtang gittimni development committee-rangna pakwate on·manaha aro ia kamna gittimantinan adita tangka paisarangko on·na gitaba sorkari tik ka·angaha ine Chelani parakataha.
Deputy Commissioner-ni parakatani gitade, Tura jillako nitoataniba Meghalaya Games-ko sokachakani bakan ong·enga.
Meghalaya Games-ko sokachakanio dingtang dingtang kal·susaanirangna seoke dongimin biaprangara, Archery-na Danakgre-ni Montfort School, Track & Field (Athletics)-na Dakkopgre, Badminton-na Tura Indoor Sports Hall, Basketball-na Rongkhon Sports Complex, Boxing-na Don Bosco School, Cycling-na Rongkhon jol, Me·asarangni Football-na PA Sangma Stadium, Me·chikrangni Football-na Chandmary Football Ground, Golf-na BSF Ground, Shooting-na 2nd MLP Battalion Hq Goeragre, Sports Climbing-na PA Sangma Stadium, Swimming-na Rongkhon Swimming Pool aro gipinrang ong·a.