U·IATTIMGIPAONI
SHILLONG: Meghalaya a·dokni Job Reservation Policy-ko gital dake nipilna songgipa expert committee-ko jagittamna skangan songahaoba da·alonan kamrang ka·sinengkua aro ia committee-ko songchengaoni changsasan tom·e chanchirimaniko dakkuenga.
Ia expert committee-ni kamrang ka·sinengani gimin Sombar salo KHNAM dolni dilgiparang, a·dokni Chief Secretary-ko grongenba, ia expert committee-ni kamrangni bidingo sing·sandie ra·angaha.
KHNAM dolni working president Thomas Passah-ni parakatani gitade, Reservation Policy-ni bidingo bon·kamgipa tom·e chanchirimaniko May jani 31 tarikosa dakahachim aro Expert Committee-ko songa intalan maming kamrangan ong·kujaengachim.
Passah-ni aganani gitade, Chief Secretary-ko gronge uamang agangrikeon, November-ni 23 tariko internet gita iani bidingo agangrikaha aro gnigipa tom·aniko December-ni 6 tariko internet gitan ong·attaina sienga ine Chief Secretary, KHNAM dolni dilgiparangna aganataha.
Iani ja·man, gittamgipa tom·aniko Shillong-o ong·atanggen aro uni ja·man, political dolrang, NGO-rang aro gipin dolrangko expert committee-na an·tangtangni nangnikanirangko u·iatchina agangen ineba KHNAM dolni working president parakataha.
Reservation Policy-ko nipiltaina songe on·gipa expert committee-ni kamrang ka·sinengani gimin suk ong·gijaniko parakatengon, Reservation Policy-ni kinggnimangmang donggipa niamrangko taridapna gitade indita somoirangko ra·na nangjachim ine KHNAM dolni dilgiparang parakataha.
“Expert committee-ni kamrang ta·rakgen inesa chinga ka·dongsoengachim indiba Chief Secretary chingko sengkuchinasa aganaha,” ine Passah aganaha.