TURA: Garo Hills Autonomous District Council (GHADC)-ni nangchongmotgipa kamrangni gimin ma·sie ra·na gita Right to Information (RTI) ka·e sing·sandiani bidingo GHADC-ni public information officer (PIO), aganchakanirangko on·jaha ine South Garo Hills-ni social activist saksa Greneth M Sangma, GHADC-ni First Appelate Authority-na badi ka·doangaha.
Iani bidingo GHADC-ni dilgiparangna badi ka·doangengon, South Garo Hills a·jani ning·o donggipa a·kingrango land reform aro map-rangko salani bidingo ma·sie ra·na gita ua RTI ka·ahachim indiba GHADC-ni PIO, iani bidingo maming aganchakanirangko on·chipjaha ine Sangma parakataha.
“South Garo Hills a·jao donggipa a·kingrango land reforms aro gipin nangchongmotgipa kamrangni bidingo ma·sie ra·na gita anga 2023 bilsini October 31 tarikon RTI file ka·ahachim aro RTI Act-ni dongimin niam gitade, sal 30-ni gisepon GHADC-ni PIO aganchakaniko on·ani ong·achim. Indake ong·genchimoba da·alona kingkingan ua angni sing·atgipa kamrangni gimin aganchakaniko on·chipkuja aro uko phone ka·e sing·atna jotton ka·oba ua phone-ko ra·chakjaha,” ine Sangma parakataha.
GHADC-ni PIO, RTI ka·anina aganchakaniko on·jaha ine an·tangni suk ong·gijaniko parakatengon, ia kamrangni gimin ua tol·e talatna jotton ka·genchimode ba kakket sakkirangko nisigalgenchimode, RTI Act 2005-ni Section 21-o pangchake ua, 2023 bilsini October 31 tarikonin a·bachenge salantian gong 250/- daiko gamna nanggen ine Sangma mikrakataniko on·ataha.