SWGH-o sam badinggipa mande sakbriko rim·a

TURA: South West Garo Hills a·jao Anti Narcotic Task Force (ANTF)-ni sipairang, Damalgre Police Station-ni ning·o donggipa Balalgre songo am·sandianirangko dakenba, niam gri drugs ba pekatgipa samrangko badingenggipa mande sakbriko rim·na man·aha.
SWGH a·jani SP Vikas Kumar-ni u·iatani gitade, Assam aro gipin biaprangoniko drugs badingsrukbaanirang batroroengani gimin Sukrobar walo, SWGH a·jani Deputy SP Ravi K Sangma-ni dilanichi, ANTF-ni sipairang, Balalgre songo am·sandianirangko dakon, ia mande sakbriko, pekatgipa samrang aro gipin bosturang baksa rim·na man·aha.
Rim·ako man·gipa manderangara, Tura Balading-oni Chanchu M Marak, Tura Hawakhana-oni Santo Bhowmick, Tura Hawakhana-oni Raj Barman aro Singimari songoni Topon Das ong·achim.
Ia manderangoniko police-rang, rong 150 SPSHEN + tablet-rang baksana autorickshaw bolsa aro mobile phone ge·gittamkoba rim·aha.
Ia manderang, pekatgipa samrangko Garo Hills-ni dingtang dingtang biaprango palna gita Assam a·dokni Mankachar-oniko ra·baengachim ineba SWGH a·jani SP parakataha.
Indake ong·engon, banoba iandake niam gri sam badingsrukaniko kobor man·genchimode ba nikgenchimode ta·raken sepangbatgipa police station-rangona u·iatchina gita SP didiataha.