TURA: South Garo Hills a·jani Nokatgre songo donggipa Renang Dare samba jolo ro·ong quarry bikotna miksongenganiko songni manderang aro Garo Students Union (GSU) Karukol regional unit-ni jegalatahani ja·man Chokpot jolo donggipa dingtang dingtang dolrangba iako raken jegalataha.
“Renang Dare, ian South Garo Hills a·jani Chokpot aro Siju Block simao mingsinggipa chidare ong·a aro ia biapko nina gita dingtang dingtang biaprangoni aro gipin a·songrangoniba manderang re·batokenga. Iandakgipa biaprangko nosto ka·e galna chanchiania A·chik a·songo songdonggiparangna namen dukni ong·a aro iandakgipa nina nitogipa biaprangko nisina jotton ka·aniara matburingni gisik gita chacha ong·a. Ia biaponiko ro·ong bikotna ari sale ra·anio songo donggipa nokdang ge·dokni baganrangkoba man·chapaha ine nikna man·enga aro ia biapo ro·ong bikotna songni nokni manderang baksa agangrikchenggija an·tangtangni ska gita dakdrana jotton ka·aha,” ine Chokpot jolni nangrimgimin dolrang parakataha.
Ia kamna Chokpot jolni NGO-rang, GSU Mindikgre unit-ni president aro an·tangko social activist ine a·kangenggipa Greneth M Sangma-koba matnangattokaha.
“Greneth Sangma an·tangko South Garo Hills-ni social activist ine biming ra·e MDA sorkari aro Garo Hills-ni dingtang dingtang biaprango ka·gipa kamrangko nirok sandina gita RTI ka·ronggipa ong·achim indiba da·o South Garo Hills a·jatangni mingsinggipa biapkon nosto ka·na miksongskaenga? Iako kamko ka·e ua a·jatangon golmalko ra·bana miksongengama? South Garo Hills-ni social activist ine kamko ka·ani da·o mai namgni dongkuenga? Na·a saksa NGO-ni gitcham dilgipa ong·e iandakgipa kamko ka·aniara kraani ong·ama?” ine Chokpot jolni nangrimgimin dolrang matnangataha.
South Garo Hills a·jani DFO bang·a changon biaprangko nichenggijasa NOC-rangko skatang pakwate on·ronga ineba Chokpot jolni NGO-rang matnangataha.
“A·chik a·songko nirok sandigipa aro a·a chiani kosako bilko man·gipade GHADC-sa ong·ani gimin GHADC-ni hokum gride skatang ro·ong bikotna man·jawa,” ine Chokpot jolni NGO-rang parakataha.
Ia biapo ro·ong quarry-ko dakna manchienggipa manderangko dontongchina gita mol·molatengon, ia mol·molaniko manigija ro·ong quarry-ko kulina jotton ka·angkugenchimode South Garo Hills a·ja gimik nangrime jingjengatanirangko dakanggen ine Chokpot jolni nangrimgimin dolrang mikrakataniko on·angaha.