AMPATI: Sombar salo, South West Garo Hills a·jani Ampati jolo donggipa Chelipara Sub-Centre-ko PM-ABHIM-ni ning·o Mahendraganj constituency-ni MLA Sanjay A Sangma nokdonggae on·angaha aro ia sub-centre-ko nokdonggaanio, Boldamgre-ni MDC Stevie M Marak, South West Garo Hills a·jani Deputy Commissioner RP Marak, Betasing C&RD Block-ni BDO CRN Sangma, South West Garo Hills a·jani DM&HO Dr H Barman, gipin medical officer-rang, songni nokmarang, mondolini dilgiparang aro songni manderangba dongpae bak ra·angtokaha.
Ia Chelipara Sub-Cenre-ko gong lak 55 koros ong·e Chelipara VHC rikaha aro ian Chelipara baksana samba jolrango donggipa dingtang dingtang songni gimik sak 4000 manderangna sanna bananirangko on·na dakchakani ong·gnok.
Ia sub-centre-ko nokdonggae on·anganio, Mahendraganj-ni MLA, jinmana aganprakengon, manderangna an·seng baljokaniko on·na gita a·dok aro ma·mong sorkarirang rakbee kamrangko ka·engani giminsa da·alo ia sub-centre-ko jolni manderangna nokdonggae on·na man·aha ine parakataha.
An·senggipa nokdangko aro dedrangko dal·atna man·na gita ma·a paarangko aro mongsongbate ma·giparangko, an·tangtangna simsakchina gitaba Sangma didiangaha.
Ia sub-centre-ko name nirokchina aro sub-centre-ko chalaianio pilak nanga dakchakanirangko on·china gitaba ua songni manderangko didiangaha.
Ia tom·anio SWGH a·jani Deputy Commissioner RP Marak-ba jinmana aganprakangengon, ia sub-centre-ko kulina man·aniara, sorkarini manderangna an·seng baljokaniko on·na on·kange kam ka·ani a·selsa ong·aha ine parakataha.
Ia sub-centre-ko nokdonggae on·anganio, jinmana aganprakanggipa gipin manderangara, SWGH a·jani DM&HO Dr H Barman, District MCH Officer Dr Noreen Sangma aro gipinrang ong·a.
