SHILLONG: Shillong Lok Sabha constituency-o an·tangtangni candidate-ko susaatgija Voice of the People’s Party (VPP)-ni candidate Ricky AJ Syngkon-na chakskachina gita Sombar salo VPP-ni dilgiparang, UDP aro HSPDP dolrangni nangrime bikotgipa Regional Democratic Alliance (RDA)-ko didiataha.
Sombar salo, VPP-ni election-na tom·aniko Mawkriah-o ong·atanio jinmana aganprakangengon, VPP-ni tom·anirango bang·bea manderangni bak ra·aniko UDP aro HSPDP dolrangni nangrime rikenggipa RDA nikenggnok ine VPP-ni president Ardent Miller Basaiawmoit janapatenba, ia election-o doltangni candidate-ko susaatgija VPP-ni candidate-na chakpaaniko on·ode nambatgipa ong·gen ine parakataha.
Shillong Parliamentary constituency-ni manderang, ia chang election-o VPP-ni candidate-kon seokna tik ka·manaha ineba ua aganaha.
“Joltangni political dolrangko ma·sichakbebegipa ong·genchimode UDP aro HSPDP dolrang, VPP baksa bakrimna nangenga. Ia election-o RDA susagenchim ong·ode BJP aro NPP dolrangna kam ka·giparang inesa mesokani ong·aignok,” ine Basaiawmoit aganaha.
Batanggimin bilsidokna UDP, HSPDP aro BJP dolrangba NPP-chi dilenggipa MDA sorkarini bakan ong·aha ine janapatskaengon, ia dolrang pilakan sorkarini ong·gija kamrango bak ong·pagiparang ong·a indiba da·o ia dolrang, manderangko togichana man·jawaha ine VPP-ni president aganaha.
Iana skang, VPP-ni tom·aniko Mairang jolo donggipa Langtor-o ong·atanioba ua jinmana aganprakangengon, Congress dolni chu·sokjahani a·selsa BJP, a·songko sason ka·na man·aha ine parakataha.
Congress dolara KHADC-ode NPP baksa apsan kam ka·rimgipa ong·enba Assembly-ode opposition dol ong·skaengani gimin manderang Congress dolo bebera·na man·jawaha ineba Basaiawmoit aganaha.