SHILLONG: Adita salrangna skang, Shella constituency-ni ning·o donggipa Ichamati-o gipin jat mande sakgniko so·otgipani bidingo police-rang, Khasi Students Union (KSU)-ni membor sakgniko rim·aha.
Ia mande sakgniko police-rang, Sombar walo rim·aha aro uamangara Sohra-oni bilsi 26 ong·gipa Mesadapbor Skhembil aro Mawlong Sirdarship-ni bilsi 26 ong·gipa Shanborlang Shati ong·a.
Rim·a man·gipa mande sakgniara, KSU South Khasi Hills District unit-ni membor-rang ong·achim.
KSU-ni membor sakgniko rim·ani bidingo kobor ra·timgiparangna u·iatengon, da·o dipet ia case-ni bidingo darangnaba u·iatna man·kujawa ine East Khasi Hills a·jani SP Rituraj Ravi parakataha.
Da·o dipet ia KSU-ni membor sakgniko Sadar Police Station-o donkuengpiti.
Re·anggipa March-ni 27 tariko, Citizenship Amendment Act-ko jegale, KSU aro gipin dolrangni Ichamati-o jinma re·jomaniko ong·atani ja·man, rong·chun quarry-rango kam ka·enggipa Ishan Singh aro Sujit Dutta-ko ma·sina man·gijagipa manderang, so·ote galahachim ine nikna man·a. Ia mande saksani manggisiko Ichamati-o aro sakgipinni manggisiko Dalda-oniko man·ahachim.
Iani bidingo sianggipa mande saksani ma·drangrang police-rangna FIR ka·aha aro FIR-o uamang KSU-ko biming mingahachim.