Election-ko tom·tome ong·atna tarisoenga: Tiwari

SHILLONG:  A·songni gipin gipin a·dokrango gita dake Meghalaya-oba re·baenggipa Lok Sabha election-rangna tarisoengon, Election  Department, kror 37-na batpilgipa tangkani drugs, churangko rim·aha aro tangkarangko rim·aha.
Chief Electoral Officer, BDR Tiwari-ni Butbaro parakatani gitade, model code of conduct-ko ra·gatna skang, kror 33.45 tangkana batpilgipa pekgipa bosturangko rim·aha aro MCC-ko ra·gatani ja·mano kror 4.06-ni bosturangko rim·aha.
Ia rim·anio tangkarang,  pekgipa ringani aro gipinrang donga.
Indake re·baenggipa Lok Sabha election-rangna tarisoenggipa kamrangni bidingo Election department, Election Commission of India baksa tom·e nipilanirangko dakangaha aro Meghalayao da·o dipetode election-ni bidingo maming neng·nikanirangkode nikjaha.
“ Meghalaya, jakgitele, nitoe aro dongnuani grigipa election-ko ong·atna tarienga,”  ua aganaha.
Chief Secretary-ni gadango songsul Assam baksaba agangrikanirangko dakangaha ine aganengon, Meghalaya-o dam 187 polling station-rang Assam baksa an·pagipa sima arirango donga aro Assam baksa an·pagipa international sima arioba dam 140  polling station-rang donga ineba Tiwari aganaha.
Iarangna agreba, Meghalaya-ni polling personnel-rang, dam 164 Polling station-rangonade Assam-ko nappake re·na nanggen aroba voter-rangba apsandaken ong·enga.
Indake ong·engon, ia pilak obostarangni bidingo a·dok damgnian chanchirimangaha.
Unomitingo da·omiting Ichamati-o ong·enggipa obostarangna adita jajrengna nangani ong·enga.