SHILLONG: Je biaprangon Shillong-Dawki ramako tarina gita a·arangko ra·manahachim, uandakgipa biaprangode kamrangko a·bachengna gita Defence-ni official-rang, NHIDCL-na permission-ko on·atmanaha.
Shillong-Dawki ramako tarianio, Eastern Air Command (EAC) baksana Defence-ni kilometer 4-mangni gita biaprangkoba man·chapengani gimin Defence-ni official-rang, NHIDCL-na permission-ko on·kujaengachim ine nikna man·a.
NHIDCL official saksani parakatani gitade, Rilbong sambao donggipa metre 170-mangni gita biaprango kamrangko a·bachengna da·o Defence-ni official-rang, NHIDCL-na permission-ko on·ataha.
A·a ra·gimin biaprango kamrangko a·bachengna gita Defence-ni official-rang, NHIDCL-na permission-ko on·maha aro da·o kamrangko a·bachengatengaha ineba NHIDCL-ni official parakataha.
Ia Shillong-Dawki ramako four-lane dake tariengachim aro iano overbypass-ba donge Jhalupara-ni Anjalee Petrol Pump aro Mahavir Park-na skangmangmang naeangachim.
Ia ramako taria matchotahaode Guwahati-chipakna re·angenggipa garirang overbypass gita re·angna man·gnok aro Upper Shillong-chipakna re·angenggipa garirangde Bypass ning·a gita re·angskana man·gnok.
Ia ramako NHIDCL da·o dipet Barik-onasan tarina gita ge·etanirangko man·engkua ine janapatengon, ia ramako tarina a·arangko ra·anio uamang a·dok sorkarini dakchakanirangko bang·e man·brejaha ine NHIDCL-ni official parakataha.
Ia project-ko sanction ka·aoni bilsibri ja·manchakahaoba Package-4-ni Mawshun Bypass ning·o Saitbakan-oni Wakhadai-ona kingking metre 710 ong·gipa a·arangko da·onan a·dok sorkari, NHIDCL-na pakwate on·kujaenga ineba official parakataha.