SHILLONG: Meghalaya a·dokoba central university-rango admission-ko ra·na gita Common University Entrance Test (CUET) porikkako Budbar sal dipet a·bachengatahaon, chatro chatrirangna admission-ko on·na gita CUET-o pangchakaigija Class 12 porikkani result-rangosa pangchakchina Voice of the People’s Party (VPP), NEHU aro a·dok sorkario dabiangaha.
Budbar salo, NEHU-o CUET porikkako ra·anio chatro chatrirang aro porikka seaniko nirokenggipa manderangba neng·nikanirangko chagrongna nangtokahani gimin suk ong·gijaniko parakatengon, “CUET porikkako ra·anichi chatro chatrirangni iandakgipa neng·nikanirangko chagrongna nanganian National Testing Agency (NTA), a·dok sorkari aro NEHU-ni tarisamsoanirango chu·onggijaniko mesokani ong·aha,” ine VPP media cell-ni membor Dr Rusievan Shangpliang parakataha.
“CUET porikkako seanio chatro chatrirangni namgnina nirokdilgipa official-rang dongjani a·selan chatro chatrirang iandakgipa neng·nikanirangko chagrongna nangtokaha. Chatro chatrirang an·tangtangni porikkako sena donsogimin somoioni konta gittammang ong·na sipile sengna nangtokaha,” ine Shangpliang parakataha.
Porikko seanio iandakgipa neng·nikanirangko chagrongna nangahani a·selan chatro chatrirang porikkako name sena man·tokjaenggnok ineba ua an·tangni suk ong·gijaniko parakataha.
“Iani bidingo VPP, Assembly ning·o aro Assembly-ni a·paloba a·dok sorkarina mikraksamsoataniko on·ahachim,” ine Shangpliang parakataha.
Shangpliang-ni parakatani gitade, chatro chatrirangna a·dok sorkari aro Education minister simsakna gisiko nangjaha aro iani bidingo politics-kosa kal·na jotton ka·skaahachim.
“Media-rango janapgimin gita college-ni principal-rangba CUET porikkako ra·ani bidingo a·dok sorkari ba NEHU-oniko name agan-talate on·anirangko man·sojaha. Iandake sorkarini kam ka·anirangchi chatro chatrirangsa neng·nikanirangko chagrongna nangtokaha,” ine VPP media cell-ni membor parakataha.
“Uni gimin university-o admission on·na gita a·dok sorkari aro NEHU, CUET porikkako pangchakgija Class 12 porikkani result-rango pangchakna man·ode nambatgen,” ine Shangpliang parakataha.