TURA: East Garo Hills a·jani Rongjeng jolo, Milawe-oni Baringre-ona Pradhan Mantri Gram Sadak Yojana (PMGSY) ramako name tarija ine ia ramako tarigipa contractor-ni kosako A·chik Holistic Awakening Movement (AHAM) Rongjeng regional unit, Williamnagar-o donggipa PWD (Roads)-ni Executive Engineer-na badi ka·doataha.
AHAM Rongjeng regional unit-ni parakatani gitade, ia Milawe-oni Baringre-ona dakanggipa ramara ia jolrango songdongenggipa manderangna mongsongbatgipa re·a doani chol ong·achim indiba ia PMGSY ramako tarigipa contractor, ia ramako name tarijahani a·sel ramarang nosto ong·na a·bachengahachim.
“Ia ramako tariani bidingo jagittam jabrimangnade chinga contractor-na changni chang u·iatahachim indiba ramako taridapanirang dongjahani giminsa chinga PWD-ni official-rangna badi ka·dona nangao ga·akaha,” ine AHAM Rongjeng regional unit-ni dilgiparang parakata.
Ia ramani bidingo ta·raken am·sandianirangko dakenba contractor-ni kosako rakgipa ja·kurangko de·china aro ia ramako taripile on·china gitaba AHAM Rongjeng regional unit didiataha.