Resubelpara: Salgittamna kingking re·roenba Garo Hills-o lekka-porani obostarangko nipil-nirokanirangko dakanio, Meghalaya State Education Commission (MeSEC), bon·kame Sukrobar salo North Garo Hills-ni’ Resubelpara-o, Deputy Commissioner-ni Conference Hall-o dingtangmancha tom·aniko ong·atenba, North Garo Hills ong·enggipa da·oni lekka-porani obostarangko nipil-nirokanirangko dakangaha.
Commission Chairman S M Sungoh-ni dilanio Member Secretary, Education department, Ambrose Ch Marak, Adviser aro gitcham MPSC Chairman David R Syiemlieh, gipin co-opted member-rang aro MeSEC-ni official-rang Sukrobaro, district-ni dingtang dingtang Secondary, Higher Secondary School-rangni Principal-rangko, uandake district-o ge·sasangipa Mendipathar college-ni Principal-ko gronge agangrikaha.
A·dokni district ge·antionan wenroroenba lekka-porani obostarangni nipil-nirokanirangko dakchina gita A·dok Sorkari MeSEC-na ge·etaniko on·engon, institution-tangtango uamangni chagrongenggipa neng·nikani, nangnikani aro agan-ku·pattianirangko on·china gita MeSEC memborrang, educational heads ba skotongrangko didiaha. Educational institution-rangni dingtang dingtang skotongrang agan-ku·pattianiko on·engon, daito gnanggipa authority-rang institution-rangko namedake nirokjringna nanga, skul nok-chu·onggijarangko rike on·na nanga, bangbanggipa post-rango staff-rangko gapatna nanga aro fund-rangko chu·onga gita chamatna nanga ine agan-ku·pattianirangko on·angaha.
Chanchirimani somoio, bang·bata School-rangni Principal-rangan, skul nokrangko namdapatna nanganirangko agantokaha.
Unomitingo maniani salrang dongani gimin sin·karini chuttirangko bakroe on·ani giminba haida chatro-chatrirangni poraina aratanirangba sokakon, unigimin school academic calendar-ko dingtangatna man·ode nambatgenchimma ine North Garo Hills-ni Additional Deputy Commissioner, Jude RT Sangma chanchiatangko parakaha.
Indake ong·engon, skie on·anirangko namdapatna, teachers’ orientation programme-rangko ong·atna, counseling programna skul ge·prako sakprakko donna aro chatro-chatrirangni poraianio neng·nikanirangko nina ine MeSEC official-rang chanchianiko ra·gate donangaha.
