TURA: West Garo Hills a·jani Selsella-o Automated Teller Machine (ATM)-ko kulichina aro Selsella-Balachanda ramako tarie on·china gita batanggimin bilsirangonin Selsella jolni ASWA, FKJGP, GSU aro ADE dolrang dabitokengoba da·onan ia dabianirangko chu·sokate on·kujaengani gimin ia kamrangko sal 21-ni gisepon chu·sokate on·china a·dok sorkarina somoiko on·angaha.
Ia dolbri NGO-rangni parakatani gitade, Selsella-o ATM-ko kulie on·china gita uamang 2021 bilsionin SBI-ni branch manager-na changni chang sedoatahachim aro ia biapo nokkoba rikade rikahachim indiba da·alona kingkingan ia ATM-ko kulichipkujaengachim.
“Selsella-o ATM nokko rikahaoba machine-ko jakkalkujaengani a·selan manderang ia ATM-ko jakkalna man·jae neng·nikanirangko chagrongna nangtokenga,” ine dolbri NGO-rang, a·dokni Chief Minister-na sedoatgipa chittio parakataha.
Selsella-Balachanda ramako tarie on·china gita Chief Minister-ko gisik ra·atpiltaiengon, “Ia ramani obosta namsrangjahani gimin chinga changni chang PWD-na mol·mole sedoataha aro CM-ni office-onaba sedoatahachim indiba da·alona kingkingan ia ramako tarie on·kujaengani a·sel Selsella, Balachanda aro Rajabala jolni manderangna namen neng·nikani ong·enga,” ine dolbri NGO-rang parakataha.
“Ia dabianirangko chu·sokate on·chipkujaengani giminan Selsella jolni manderang sorkarini kosako suk ong·tokjaenga aro ia kamrangko chu·sokate on·na man·jagenchimode ian sorkarini chu·sokgijaniko mesokanisa ong·gen. Uni gimin ia chittiko on·ataoni sal 21-ni gisepo Selsella-o ATM-ko kulijagenchimode aro Selsella-Balachanda ramako tarina a·bachengjagenchimode chinga dontonggija jingjengatna gita draatako man·gen,” ine Selsella-ni ASWA, GSU, FKJGP aro ADE dolrang parakataha.
Selsella-o ATM-ko kulina aro rama tarina sal 21 somoiko NGO-rang on·a
Date:
Share post:
